Home Movie Reviews

0 868

2015 ஆம் ஆண்டு ஜெயம் ரவிக்கு மிகச்சிறப்பான ஆண்டாக அமைந்தது. தொடர்ந்து மூன்று ஹாட்ரிக் ஹிட்டுகளை கொடுத்தவர் என்பதால் மிருதன் படத்துக்கு முன்னெப்போதும் இல்லாத அளவுக்கு எக்கச்சக்க எதிர்பார்ப்பு. அதானாலேயே சுமார் 1000 தியேட்டர்களில் மிருதன் ரிலீசாகியிருக்கிறது.

ஒவ்வொரு படத்திலும் வித்தியாசமான கதைக்களத்தோடு ரசிகர்களை சந்திக்க வேண்டும் என்கிற பொறுப்பு ஜெயம்ரவியின் ஒவ்வொரு படத்திலும் பார்க்க முடிகிறது. அதிலும் தனி ஒருவன் படத்தின் அசூர வெற்றி ஜெயம் ரவி மீதான எதிர்ப்பார்ப்பை இன்னும் அதிகமாக்கியிருக்கிறது.

அந்த வகையில் இந்தியாவிலேயே முதல்முறையாக வந்திருக்கும் ‘ஸோம்பி’ வகை ஜானரான ‘மிருதன்’ படத்தை டிக் செய்திருக்கிறார்.

ஊட்டியில் வசிக்கும் ஜெயம்ரவி ஒரு ட்ராபிக் கான்ஸ்டபிள். இவருக்கு தனது அன்புத் தங்கை பேபி அனிகா மட்டுமே உலகம். அவள் நல் வாழ்வுக்காக எந்த பிரச்சனைக்கும் போய் விடக்கூடாது என்பதால் ரிஸ்க்கே இல்லாத ட்ராபிக் கான்ஸ்டபிள் வேலையை கேட்டு வாங்கிக் கொள்கிறார்.

லட்சுமிமேனன் அதே ஊட்டியில் வேலை செய்யும் ஒரு டாக்டர்.

அந்த ஊரில் இருக்கும் ஒரு பேக்டரியில் தவறி விழும் ஒரு திடக்கழிவை தெருநாய் ஒன்று சாப்பிட்டு விட, அதிலிருக்கும் வைரஸ் தெருநாயிடம் தொற்றிக் கொள்கிறது. வெறி பிடித்த அந்த நாய் அதே பேக்டரியில் வாட்ச்மேனாக வேலை செய்பவரை கடிக்க, அவருக்கும் வெறி பிடித்து அவர் தனது மனைவி, அம்மாவை கடிக்க, அப்படியே ஊட்டி முழுக்க தீயாகப் பரவுகிறார்கள் ஸோம்பி மனிதர்கள்.

வேகமாகப் பரவும் அந்த வைரஸை கொல்வதற்காக புதிய மருந்து ஒன்றை கண்டுபிடிக்க லட்சுமிமேனன் உள்ளிட்ட டாக்டர்கள் குழு ஊட்டியை விட்டு வெளியேறி கோயம்புத்தூரில் உள்ள மருத்துவனைக்கு அவசரமாக செல்கிறார்கள். போகிற இடத்தில் ஜெயம் ரவியின் தங்கச்சியான பேபி அனிகாவுக்கும் அந்த வைரஸ் தொற்று ஏற்பட்டு விடுகிறது.

இப்படிப்பட்ட சூழலில் வைரஸை அழிக்க மருந்து கண்டுபிடிக்கப்பட்டதா? வைரஸ் தொற்றிலிருந்து தன் தங்கை அனிகாவை ஜெயம்ரவி காப்பாற்றினாரா? என்பதே கிளைமாக்ஸ். இடையில் ஜெயம்ரவி – லட்சுமிமேனன் லைட்டான லவ் போர்ஷனும் உண்டு.

தனி ஒருவனில் ஐ.பி.எஸ் அதிகாரியாக கம்பீரமாகவும், மிடுக்குடனும் வந்த ஜெயம் ரவி இதில் ட்ராபிக் போலீசாக வந்தாலும் அதே கம்பீரமும், மிடுக்கும் இம்மியளவு குறையவில்லை.

படத்துக்கு படம் கேரக்டருக்காக அவர் போடுகிற உழைப்பு அபரிமிதமானது. அப்பேர்ப்பட்ட உழைப்பை இந்தப்படத்திலும் தரத் தவறவில்லை.

எந்த பில்டப்பும் இல்லாமல் ஒரு சாதாரண கேரக்டர் தான் அவருடையது. அதிலும் கூட அவர் மெனக்கிடல் அப்பட்டமாகத் தெரிகிறது. ஒரு பகலில் சாலையில் லட்சுமிமேனனைப் பார்த்து காதலில் விழுவதும், பிறகு அவருக்கு பாய் ப்ரெண்ட் இருக்கிறார் என்பது தெரியவும் தனது காதலை சைலண்ட்டாக்கி விட்டு அவரை தூரத்தில் இருந்து ரசிப்பதும் அவ்ளோ அழகு.

ஸோம்பிகளிடமிருந்து டாக்டர்கள், தனது தங்கை தனது நண்பன் காளி ஆகியோர்களை காப்பாற்ற போடும் சண்டைகள் எல்லாமே ஆக்‌ஷன் அட்ராசிட்டி.

உயிர் போகப்போகிற நேரத்தில் கூட தனது காதலியை எப்படியாவது ஸோம்பிக்களிடமிருந்து காப்பாற்றி விட வேண்டும் என்று போராடுகிற காட்சியில் காதலின் ஆழத்தை நடிப்பில் அழகாக பிரதிபலித்திருக்கிறார்.

ஜெயம்ரவியின் காதலி என்பதை விட ஒரு டாக்டராகத்தான் அதிக முக்கியத்துவத்தோடு வருகிறார் லட்சுமிமேனன். சொல்லு என் மேல யாருக்குமே இல்லாத அக்கறை உனக்கு மட்டும் எதுக்கு? எதுக்காக என்னை காப்பாத்த முயற்சி பண்ற என்று லட்சுமிமேனன் ஜெயம்ரவியிடம் கேட்கிற காட்சியில் உருக்கம்!

என்னை அறிந்தால் படத்தில் அஜித்துக்கு மகளாக வந்த பேபி அனிகா இதில் ஜெயம்ரவிக்கு தஙகச்சியாக வருகிறார். வைரஸ் தாக்குதலுக்கு தான் ஆளானதும் என்னோட குணம் மாறிப்போறதுக்குள்ள துப்பாக்கியால சுட்டுடுண்ணே… என்று சொல்கிற காட்சியிலும், என் அண்ணனோட பர்ஸ்ல ஒரு பொண்ணோட போட்டோ இருக்கு, அவங்களை அவருக்கு ரொம்ப பிடிக்கும், எப்படியாவது அவங்களை என் அண்ணனோட சேர்த்து வெச்சிடுங்க என்று லட்சுமிமேனனிடம் சொல்கிற காட்சியில் நெகிழ வைத்து விடுகிறார் அனிகா.

காமெடிக்கு காளி இருந்தாலும், அரசியல்வாதியாக வரும் ஆர்.என்.ஆர் மனோகரும் முதலில் கேத்து காட்டி பின்னர் ஸோம்பிக்களின் தாக்குதலுக்கு பயந்து நடுங்குவது கூடுதல் காமெடி.

இமானின் பின்னணி இசையில் படத்தின் ஒவ்வொரு காட்சியும் மிரட்டலுடன் நகர்கிறது. மிருதா மிருதா பாடல் அழகான மெலோடி.

எஸ்.வெங்கடேஷின் ஒளிப்பதிவில் நைட் எபெக்ட் காட்சிகளும், ஸோம்பிகளின் மேக்கப் முகங்களும் உறுத்தாத காட்சிகள்.

‘நாய்கள் ஜாக்கிரதை’ படத்தின் வெற்றியைத் தொடர்ந்து சக்தி செளந்தர் ராஜன் இயக்கத்தில் வந்திருக்கும் படம், கோயம்புத்தூருக்கு போகும் சாலையில் அத்தனை கார்கள் கீழே கிடந்தாலும் எல்லா ஸோம்பிக்களும் ஜெயம்ரவியின் காரை மட்டும் ஏன் சுற்றி வளைக்கின்றன? லட்சுமிமேனன் சுட்டபிறகு ஜெயம் ரவி இறப்பதாக கிளைமாக்ஸில் காட்டப்படுகிறது. அதன்பிறகு அவர் எப்படி உயிரோடு வந்து சென்னைக்கு போகிறார்.

வைரஸ் தாக்குதலுக்கானவர்கள் எல்லோரும் அடுத்த நொடி ஸோம்பிக்களாக மாறிவிடும் போது ஜெயம் ரவியின் தங்கை அனிகாவும், ஜெயம்ரவியும், கூடவே வரும் ஒரு டாக்டரும் மட்டும் ஏன் உடனே மாறாமல் திடீரென்று அவர்களுக்கு அதை எதிர்க்கிற சக்தி இருப்பதாக காட்டப்படுகிறது.

இப்படி பதிலிள்ளா சில கேள்விகள் படத்தில் இருந்தாலும் அரைத்த மாவையே அரைத்து ரசிகர்களின் பர்சை பதம் பார்க்கும் இயக்குநர்களுக்கு மத்தியில் தமிழில் இப்படி ஒரு முயற்சியை செய்ய வேண்டும் என்று யோசித்ததற்காகவே சக்தி சவுந்தர் ராஜனை பாராட்டலாம்.

0 653

சித்தார்த் தயாரிப்பில் வரும் முதல் படம் அவரே நாயகன் அவருடன் மேலும் இரண்டு புது நாயகன்களை அறிமுகம் செய்துள்ளார். ஒருவர் அவினாஷ் மற்றும் சனந்த் ரெட்டி மற்றும் ராதாரவி மற்றும் பலர் நடிப்ல் வெளிவந்து இருக்கும் படம்.

2020யில் நடுக்கும் கதை தான் ஜில் ஜங் ஜக் கள்ள கடத்தல் சம்பந்த கதை நாசரின் மகன் ஜில் ஜங் ஜக் இவர்கள் மூவரும் தெய்வம் என்பவரின் காரை ஹைதராபாத் கொண்டு பொய் கொடுக்கணும் அந்த கார் போதை பொருளால் செய்ய பட்ட கார் இதன் விழ பல கோடி இந்த காரை கொண்டுபோய் கொடுத்தார்கள இல்லை யா என்பது தான் கதை இந்த காரை கொண்டுபோகும் போது நடக்கும் நிகழ்வுககள் தான் திரைகதை .

2020 இந்தியா வல்லரசு ஆகும் என்று நாம் எல்லாம் கனவு காண்கிறோம் ஆனால் இந்த படத்தி இயக்குனர் 2020 நம்ம இந்தியா இப்ப இருக்கிறது விட ரொம்ப மோசமாக காண்பிதுள்ளார் என்றால் மிகையாகது ஆமாம் இவர்கள் சென்னையில் இருந்து ஹைதராபாத் போகும் சாலைகள் ஒரு வழி பாதை எங்கும் ஹைவேஸ் இல்லை 1950 களில் இருந்த இந்தியா போல வறண்டு கிடக்கிறது கட்டிடங்கள் இடிந்துள்ளது அப்படி ஒரு காட்சியமைப்புகள் அது மட்டும் இல்லை திரைக்கதையும் அப்படி தான் இருந்தது ஜெய்சங்கர் படம் பார்த்தது போல ஒரு எண்ணம் ஆனால் நவீன ஜெய்சங்கர் படம் என்றுதான் சொல்லணும் 2020யில் 1980 bullet பியட் கார் இது எல்லாம் யோசிக்காமல் செய்துள்ளார்கள்.

படத்தில் காமெடி என்ற பெயரில் இரட்டை அர்த்தங்கள் பல காட்சிகளில் நம்மை நெளிய வைக்குறது திரைகதை ஜவ்வு மிட்டாய் இல்ல அது இனிக்கும் ரப்பர் மாதிரி காட்சியமைப்பு படத்தில் நல்ல விஷயம் என்றால் அது சிறந்த ஒளிபதிவு மற்றும் இசை என்று சொல்லலாம் எல்லோருக்கும் இப்ப அஜித்தை ஒரு சீன்ல காமிச்ச படம் ஓடிடும் என்ற செண்டிமெண்ட் போல எல்லா படங்களிலும் அஜித்தை மறக்காமல் வந்து விடுகிறார்.

சித்தார்த் நல்ல நடிச்சு இருக்கார் ஆனால் அவருக்கு இது செட் ஆகல அது மட்டும் இல்லை ராதாரவி சிறுது நேரம் வந்தாலும் சிறப்பாக செய்துள்ளார் ஜில் ஜக் ஆக வரும் இருவரும் கொஞ்சம் ஓவர்

0 816

நம்ம வாழ்க்கை நம்மை மட்டுமே சார்ந்து இருப்பதில்லை, நம்மை சுற்றியிருப்பவர்களாலும் சார்ந்திருக்கிறது என்கிற கருத்தை மிக மிக யதார்த்தமாகவும், டிவிஸ்ட் மேல் ட்விஸ்ட்களுடனும் காட்சிப்படுத்தப்பட்டிருக்கும் படம் தான் இந்த ‘வில் அம்பு’.

நடுத்தர குடும்பத்தைச் சேர்ந்த நன்றாகப் படிக்கும் ஹீரோ ஹரீஸ் கல்யாண்!

போட்டோகிராபியில் ஆர்வமான இவர் அப்பா பேச்சுக்கு மறுபேச்சு பேசாதவர். இவரை துரத்தி துரத்தி காதலிக்கிறார் சிருஷ்டி டாங்கே, ஹரீஸ் இருக்கும் வீட்டின் அருகில் உள்ள சேரிப்பகுதியைச் சேர்ந்த சாந்தினியும் ஒருதலையாக காதலிக்கிறார்.

இன்னொரு ஹீரோ ஸ்ரீ! அதே சேரிப்பகுதியைச் சேர்ந்த குடிகார அப்பனின் மகன்.அந்த ஏரியாவில் திருடனும் கூட! இவருடைய தைரியத்தையும், துணிச்சலையும் பார்த்து காதலில் விழுகிறாள் பள்ளி மாணவியான இன்னொரு நாயகி சம்ஸ்கிருதி.

திருடனான ஸ்ரீயோ காதலிக்க ஆரம்பித்தவுடன் கொஞ்சம் கொஞ்சமாக நல்லவனாக மாற முயற்சிக்கிறான்.

நல்லவனான ஹரீஸோ தன்னைச் சுற்றியிருப்பவர்கள் செய்யும் சின்னச் சின்னத் தவறுகளால் சந்தர்ப்ப சூழலால் கெட்டவனாகி ஜெயில் வரை போகிறார்!

இந்த ஐந்து பேர்களுக்கும் இடையே இருக்கிற தொடர்பும், அதனால் நடக்கக்கூடிய சம்பவங்களும், தீர்வுகளும் தான் கிளைமாக்ஸ்.

படத்தில் ஸ்ரீ – ஹரீஸ் கல்யாண் என இரண்டு ஹீரோக்கள்.

இருந்தாலும் சீனுக்கு சீன் பக்கா சேரிவாசியாக பொருத்தமாக பட்டையைக் கிளப்பியிருப்பவர் ஸ்ரீ தான். படத்தின் பெரும்பாலான காட்சிகளில் அச்சு அசப்பில் சேரிப்பகுதியைச் சேர்ந்த இளைஞராக வாழ்ந்திருக்கிறார். அவரைப்போன்ற கேரக்டரை இன்றைக்கும் அருகிலுள்ள சேரிப்பகுதிக்குப் போனால் பார்க்கலாம்.

அப்பா பேச்சைத் தட்டாத ஹீரோவாக வரும் ஹரீஸ் கல்யாண் தனக்குப் பிடித்த படிப்பை படிக்க முடியவில்லையே? என்கிற ஏக்கம் ஒருபுறம் இருந்தாலும் மறுபுறம் தன்னைச் சுற்றியுள்ளவர்களால் அவர் படும் இன்னல்கள் படம் பார்க்கும் ஒவ்வொரு ரசிகனின் வாழ்க்கையிலும் எனக்கு மட்டும் ஏன் இப்படி நடக்குது? என்று ஹரீஸ் தன்னைத் தானே கேட்டுக்கொள்கிற கேள்வியை தங்களுக்குள் ஒருதடவையேனும் கேட்டுப் பார்த்திருப்பார்கள்.

அவருக்கு ஜோடியாக வரும் சிருஷ்டி டாங்கே நல்ல கெமிஸ்ட்ரியாக ஒர்க்- அவுட். ஆனாலும் ஹரீஸை ஒருதலையாய் காதலிக்கும் சேரிப்பெண்ணான சாந்தினி தான் ரசிகர்களின் மனதை மொத்தமாக குத்தகைக்கு எடுக்கிறார். மற்ற நேரங்களில் தர லோக்கலில் பேசும் சாந்தினி ஹரீஸ் தனது வீடு இருக்கும் தெருபக்கம் வருவதைப் பார்த்ததும் வேகமாக வீட்டுக்குள் சென்று மேக்கப் போட்டுக்கொண்டு வீட்டில் வாசலில் நிற்பதெல்லாம் ஊர்பக்கம் நாம் பார்த்த பல வெள்ளந்தி பெண்களின் அழகான உண்மையான காதல் தான்!

நகைத்திருடனாக வரும் ஹரீஸ் உத்தமன், அரசியல்வாதியாக வரும் நந்தகுமார் என படத்தில் வருகிற பெரும்பாலான கேரக்டர்கள் நிஜ வாழ்க்கையில் நாம் பார்த்த கேரக்டர்களை படத்தில் உலாவிட்டிருக்கிறார் இயக்குநர். இன்னொரு அரசியல்வாதிக்கு கொஞ்சம் நேர்மை இருக்கிறது. அதைத்தானே மக்களும் எதிர்பார்க்கிறார்கள்!

கஞ்சா கடத்தல், நகை திருட்டு என சீரியஸாகப் போகும் கதையில் ஸ்ரீயின் நண்பனாக வரும் ‘யோகி’ பாபு காமெடியில் கலக்கியிருக்கிறார். பஞ்ச் மேல பஞ்ச் பேசி அவர் வருகிற காட்சிகளில் எல்லாம் தியேட்டரில் ரசிகர்கள் வயிறு குலுங்க சிரிக்கிறார்கள்.

படத்தின் நீளம், பள்ளிக்கூட பெண்ணின் வயசு மீறிய காதல் ஆகிய விஷயங்களை தவிர்த்திருக்கலாம்.

கஷ்டப்படுற நேரத்துல கூட இருக்கிறவன் தாண்டா உண்மையான நண்பன் போன்ற வாழ்க்கையின் யதார்த்தம் பேசும் வசனங்கள் படத்துக்கு பெரும்பலம்!

ஒருவருக்கொருவர் தொடர்பில்லாத ஐந்து கதாபாத்திரங்களை வைத்துக்கொண்டு சூழ்நிலை எப்படி அவர்களை ஒன்றுக் கொண்டு தொடர்புள்ளவர்களாக்குகிறது? அதனால் வருகிற நல்லது என்ன? தீமைகள் என்ன? என்பதை இம்மியளவு சொதப்பல் கூட இல்லாமல் நகர்கிறது திரைக்கதை.

மார்ட்டின் ஜோயின் ஒளிப்பதிவும், நவீனின் பின்னணி இசையின் திரைக்கதையின் விறுவிறுப்புக்கு கூடுதல் கேரண்டி.

ஆள சாச்சுப்புட்டா கண்ணால பாடல் ஒன்ஸ்மோர் கேட்க வைக்கும் மெலோடி!

நாம் அன்றாட வாழ்க்கையில் நம்மை கடந்து போகிறவர்களால் நமக்கு எந்த ரூபத்திலாவது ஏதாவது நடக்கலாம்? என்பதை சீனுக்கு சீனுக்கு ட்விட்ஸ்ட் மேல் ட்விஸ்ட் வைத்து விறுவிறுப்பான படமாகக் கொடுத்திருக்கிறார் இயக்குநர் ரமேஷ் சுப்ரமணியம்.

0 770

ஆட்டோ டிரைவர் மு.சந்திரகுமார் எழுதிய ‘லாக்கப்’ என்ற நாவலின் திரை வடிவம் தான் இந்த ‘விசாரணை’.

முதல் பாதியில் ‘லாக்கப்’ நாவலையும், இரண்டாம் பாதியில் சென்னையின் புறநகர்ப்பகுதியில் நடந்த ஏ.டி.எம்.கொள்ளை எண்டர்கவுண்டரையும் பரபரப்பான திரைக்கதையாக்கியிருக்கிறார் இயக்குநர் வெற்றிமாறன்

ரிலீசுக்கு முன்பே பல திரைப்பட விழாக்களில் விருதுகளை வாங்கிக் குவித்த குறிப்பாக மனித உரிமையைப் பற்றிப் பேசும் படம் என்கிற உயரிய விருதை வாங்கிய இந்தப் படத்தில் அப்படி என்ன இருக்கிறது? என்கிற ரசிகரின் கேள்விக்கு பதிலாக வந்திருக்கிறது இந்தப்படம்.

தமிழ்நாட்டிலிருந்து ஆந்திராவுக்கு வேலைக்கு வரும் தினேஷ், முருகதாஸ் உள்ளிட்ட நான்கு நண்பர்கள் அங்குள்ள பார்க் ஒன்றில் படுத்துறங்கி வேலை பார்த்து வருகிறார்கள்.

வழக்கம் போல அதிகாலையிலேயே வேலை செய்யும் மளிகைக் கடையை திறக்க வரும் தினேஷையும், அவரோடு சேர்த்து அவரது நண்பர்களையும் அள்ளிக்கொண்டு போகிறது போலீஸ்!

அந்த இடத்தில் ”இவங்க என்ன தப்பு செஞ்சாங்க..?” என்று ரசிகர்களின் மனதில் எழும் கேள்வியைத்தான் அள்ளிக்கொண்டு போகும் போலீசிடமும் கேட்கிறார்கள் தினேஷூம் அவரது நண்பர்களும்!

ஒரு கோடி ரூபாய் மதிப்புள்ள திருட்டு வழக்கு ஒன்றில் நால்வரையும் கோர்த்து விடும் போலீஸ் ”செஞ்ச தப்ப ஒத்துகிட்டா உங்களை விட்டுடுவோம்” என்கிறது.

”நாங்க திருடலீங்க…” என்று பதில் சொல்லும் இளைஞர்களுக்கு கிடைப்பது என்னவோ காக்கியின் வரம்பு மீறிய ரணம் தரும் மரண அடிகள் தான்.

ஒரு கட்டத்தில் மரண வலியை தாங்க முடியாத அந்த நான்கு இளைஞர்களும் செய்யாத தவறை செய்ததாக ஒப்புக்கொள்ள, நான்குபேரையும் நீதிமன்றத்தில் ஆஜர்படுத்த கூட்டிச் செல்கிறது போலீஸ்.

நல்லவேளையாக அங்கு வரும் தமிழ்நாட்டு போலீசான சமுத்திரக்கனி தயவால் நடந்த உண்மையை நீதிபதியிடம் சொல்லி தப்பித்து, அவருடனே தமிழ்நாட்டுக்கு வருகிறார்கள்.

”அப்பாடா… தப்பிச்சோம்…” என்று லேசாக நிம்மதி பெருமூச்சோடு நால்வரும் சென்னைக்கு வருகிறார்கள்.

எந்த மாநிலமாக இருந்தாலும் காக்கியின் மனசாட்சி ஒன்று தானோ? என்று கேட்க வைக்கிறது அடுத்தடுத்த காட்சிகள்.

உயிர் காத்த உதவிக்கு பதில் நன்றி காட்டும் விதமாக சமுத்திரக்கனிக்கு உதவி செய்ய முடிவு செய்கிறார்கள் நால்வரும். முதல் பாதியில் ஆந்திர போலீசிடம் சிக்கி கந்தலானவர்கள், இரண்டாம் பாதியில் தமிழ்நாட்டு போலீசிடம் சிக்கி என்ன ஆகிறார்கள்? என்பதே கிளைமாக்ஸ்.

காவல் நிலையம் என்பது என்றைக்குமே சாதாரண மனிதர்களின் வாழ்க்கைக்கு காவலாக இருந்ததில்லை என்கிற உண்மையை பொட்டில் அடித்தாற்போல் சீன் பை சீனில் நிஜத்தை காட்சிப்படுத்தியிருக்கிறார் டைரக்டர் வெற்றிமாறன். ஹாட்ஸ் ஆப் வெற்றிமாறன் சார்!

ஹீரோவாக வரும் ‘அட்டகத்தி’ தினேஷ் அவரது நண்பர் முருகதாஸ் இன்னும் இரண்டு புதியவர்கள் போலீசிடம் வாங்கும் ஒவ்வொரு அடியும் ரசிகர்களின் நெஞ்சுக்குள் இடி போல இறங்குகின்றன. அந்தக் காட்சிகளைப் பார்ப்பதற்கே நமக்கு தைரியம் வேண்டும் என்றால் அடிக்கும் போலீஸுக்கு அதிகாரம் கொடுக்கும் தைரியம் எப்படிப்பட்டதாக இருக்கும்? அப்பப்பா…

”உங்களை நம்பித்தானே வந்தோம் சார், இப்படி கை விட்டுட்டீங்களே…” என்று உயிர் பயத்தில் சமுத்திரக்கனியிடம் அந்த இளைஞர்கள் கதறுகிற காட்சிகள் நஞ்சு மனசையும் உருக்கி எடுப்பவை. அந்த அதிகாலை வேளையில் குளிர் நடுங்க குளித்து விட்டு சட்டையை மாட்டிக்கொண்டு தலையை துவட்டிக்கொண்டே சைக்கிளை மிதிப்பதில் ஆரம்பிக்கிறது தினேஷின் அட்டகாசமான நடிப்பு. முடியும் வரை மனுஷன் மனதில் நிறைகிறார்.

நாயகியாக வரும் ‘கயல்’ ஆனந்தி வந்தது என்னவோ சில காட்சிகள் தான். ஆனால் கண்களாலேயே பேசி கண் இமைக்கும் நேரத்தில் காணாமல் போகிறார்.

”நானே இங்கே தெலுங்குகாரன்னு சொல்லி பொழைப்பை ஓட்டிக்கிட்டு இருக்கேன்” என்று தன் இயலாமையை வெளிப்படுத்தும் மளிகைக்கடைக்காரர் அல்வா வாசு மாநிலம் விட்டு மாநிலம் வாழும் பல மனிதர்களின் அப்பட்டமான சாட்சி!

காவல் நிலையம் குற்றவாளிகளை சீர்திருத்துகிற இடம் என்கிற கூற்றெல்லாம் காக்கிகள் செய்யும் அத்து மீறல்களில் காணாமல் போய் விடுகிறது. அதிலும் அந்த ஆந்திரா போலீசாக வரும் அஜய் கோஷ் பனை மரத்தின் பச்சை மட்டைகளை வெட்டியெடுத்து வெற்று உடம்போடு நிற்கும் தினேஷின் முதுகில் தயவு தாட்சண்யம் பார்க்காமல் கை வலிக்க வலிக்க விளாசுவதெல்லாம் மிருகத்தனத்தின் உச்சம்!

உயர் போலீஸ் அதிகாரியாக வரும் சமுத்திரக்கனி தன்னை நம்பி வந்த இளைஞர்களை காப்பாற்ற கடைசிவரை போராடுவதும், அவரை விட அதிகாரமிக்கவர்களும், அரசியல்வாதிகளும் மடக்கும் போது செய்வதறியாது திகைப்பதும், படத்துக்கு படம் வித்தியாசமான அதே சமயத்தில் மனதில் ஒட்டிக் கொள்கிற கதாபாத்திரத்திரம் அவருடையது.

ஜி.வி. பிரகாஷின் இசையும், ராமலிங்கத்தின் ஒளிப்பதிவும் இரவு நேர ரத்த வெறியாட்டத்தை காட்டி ரசிகர்களின் தூக்கத்தை தொலைக்க வைக்கும் தனித்துவம்.

எவ்வளவு பெரிய ஆளுமையின் ஆசி இருந்தாலும் பிரச்சனை என்று வந்து விட்டால் எப்படியெல்லாம் அரசியலும், அதிகார வர்க்கமும் கூட்டு சேர்ந்து உயிர் போகிற அளவுக்கு நம்பிக்கை துரோகம் செய்கிறார்கள் என்பதை அமைதியான ஆடிட்டர் கேரக்டரில் வெளிப்படுத்தியிருக்கிறார் கிஷோர்.

கதையில் எவ்வளவு தூரத்துக்கு உயிர் இருக்கிறதோ? அதே அளவுக்கு ஒரு சதவீதம் கூட குறையாமல் உயிர்ப்புள்ள வசனங்களை எழுதியிருக்கிறார் டைரக்டர் வெற்றிமாறன்.

”தம்பி அதிகாரிங்க பேசிக்கிட்டு இருக்கும் போது வரலாமா..? ஆமா முன்னாடியே வந்துட்டீங்களா..?” என்று நமட்டுச் சிரிப்பிலேயே விஷத்தை தடவி இளைஞர்களுக்கு பீதியை கிளப்பும் கேரக்டரில் பட்டையை கிளப்பியிருக்கிறார் எஸ்.ஐ.ஆக வரும் டைரக்டர் இ.ராமதாஸ்.

குரலற்றவர்களின் உடலின் மீது ஏவப்படும் அதிகார வர்க்கத்தின் வரம்பு மீறிய இருட்டுப் பக்கங்களை துணிச்சலாக தோலுரித்துக் காட்டியிருக்கிறார் இயக்குநர் வெற்றிமாறன். ‘ஹாட்ஸ் ஆப்’ சார்… எங்கே நல்ல சினிமா என்று கேட்கிற ஒவ்வொரு ரசிகனும் தவறாமல் தியேட்டரில் போய் பார்க்க வேண்டிய படம்!

0 743

தெலுங்கில் ‘பொம்மரில்லு’ என்ற மாபெரும் வெற்றிப்படத்தைக் கொடுத்த பாஸ்கர் தமிழில் இப்படத்தின் மூலம் எண்ட்ரி போட்டிருக்கிறார்.

எம்.பி.ஏ மேற்படிப்பு படிக்க ஆசைப்படும் ஸ்ரீதிவ்யா, இன்னும் கலாச்சார எல்லையை விட்டு வெளியே வர முடியாமல் தவிக்கும் பாபி சிம்ஹா. எல்லாவற்றையும் டேக் இட் ஈஸியாக கடந்து போகும் ஆர்யா மூன்று பேருமே நல்ல நட்பில் இருக்கும் நெருங்கிய சொந்தங்கள்.

இந்த மூவருக்கும் பெங்களூரில் போய் செட்டிலாக வேண்டும் என்பது தான் சிறுவயது கனவு.

திடீரென்று ஸ்ரீதிவ்யாவுக்கு ராணாவுடன் திருமணம் நிச்சயமாகி விட, அவரோடு பெங்களூரில் செட்டிலாகிறார். பாபி சிம்ஹாவுக்கும் பெங்களூரில் உள்ள ஓரு ஐ.டி கம்பெனியில் வேலை கிடைக்கிறது. மிச்சமிருக்கும் ஆர்யாவும் பெங்களூருக்கு வந்து விட, மூன்று பேர் வாழ்க்கையிலும் நடக்கும் அடுத்தடுத்த சம்பவங்களும், அதை ஒட்டி நடக்கும் காதல், மோதல், செண்டிமெண்ட் இத்யாதிகளும் தான் கிளைமாக்ஸ்.

கதையின் நாயகியே ஸ்ரீதிவ்யா தான். அதுவரை குறும்புத்தனமும், குதூகலமும் நிறைந்த வாழ்க்கை சூழலில் பழக்கப்பட்ட ஸ்ரீதிவ்யாவுக்கு திருமணத்துக்குப் பிறகு மூடி டைப் கணவனுடனான வாழ்க்கை எப்படிப்பட்டதாக இருக்கும்? கதையின் மொத்த கனத்தோடு, கதாபாத்திரத்தையும் கச்சிதமாக தாங்கி நிற்கிறார்! மலையாளத்தில் நஷ்ரியா ப்பூ.. என்று ஊதித்தள்ளிய கேரக்டர் அது. தமிழ்ச்சூழலுக்கு ஸ்ரீதிவ்யாவின் அழகான முகம் நல்ல பொருத்தம்.

கலாச்சார மாற்றங்களுக்குள் தன்னை இணைத்துக் கொள்ளாமல் பக்கா கிராமத்தானாக வருகிறார் பாபி சிம்ஹா.

பெங்களூர் போன்ற ஹைடெக் சிட்டிக்கு வாழ்க்கைச் சூழல் மாறும்போது பொது இடத்தில் ஒரு ஜோடி முத்தம் கொடுப்பதைக் கூட கூச்சத்துடன் பார்க்கும் பார்வையில் ஆரம்பித்து ஏர்ஹோஸ்டரான லட்சுமிராயுடன் டேட்டிங் போய் அது அந்தாக்‌ஷிரி விளையாட்டாக மாறுவது வரை என அவரது கேரக்டரே காமெடி ப்ளஸ் நிஜம்.

அப்பா, அம்மா பிரிவால் பேச்சுலராகவே இருக்கும் ஆர்யா அந்த ப்ளாஷ்பேக்கை யார் கேட்டாலும் டென்ஷனாகிறார். மற்ற இடங்களில் மனுஷன் நிஜ வாழ்க்கையில் எப்படியோ அப்படி ஒரு ஜாலியான பேர் வழி. ரேடியோ ஜாக்கியாக வரும் பார்வதிக்கும், ஆர்யாவுக்கும் இடையேயான காதல் ஒரு ஹைக்கூ கவிதை போன்ற அழகு.

பார்வதி தான் வருகிற காட்களில் எல்லாம் ஆர்ப்பாட்டமில்லாத எளிமையான நடிப்பில் கண்களாலேயே பேசி அசரடிக்கிறார்.

நாகரீக வாழ்க்கைக்கு ஆசைப்படும் பாபி சிம்ஹாவின் அம்மா சரண்யா ஒவ்வொரு கட்டத்தில் அதை நோக்கி மாற்றத்தைக் காண்பிப்பது புதிய தலைமுறைகளை பெற்றெடுத்த அம்மாக்களின் உணர்வுகளை திரையில் காமெடி கலந்து காட்டியிருக்கிறார்.

‘பாகுபலி’க்குப் பிறகு ராணா உடம்பை வெகுவாக குறைத்து மூடி டைப் கணவராக வருகிறார். உடல் மொழி நன்றாகவே வேலை செய்திருக்கிறது.சில காட்சிகளே வந்தாலும் பிரகாஷ்ராஜ் நடிப்பு நிறைவு.

கே.வி.குகனின் ஒளிப்பதிவில் பெங்களூர் நகரத்தின் அழகை இம்மி அளவு குறையாமல் அப்படியே ரசிக்கலாம். கோபி சுந்தரின் இசையில் பாடல்கள் மனதில் ஒட்டவில்லை என்றாலும், பின்னணி இசையில் மனசை பிசைகிறார். த.செ.ஞானவேலின் வசனங்கள் ஒவ்வொன்றும் அர்த்தமுள்ளவை.

பொதுவாகவே ஒரு படத்தை ஒரு மொழியிலிருந்து இன்னொரு மொழிக்கு ரீமேக் செய்யும் போது ரசிகர்களுக்கு ஏற்படுகிற எதிர்பார்ப்பு எக்கச்சக்கம். ஒரிஜினலையும், நகலையும் ஒப்பிட்டுப் பார்ப்பது வழக்கம்.

அந்த ஒப்பீடு இந்தப் படத்துக்கும் கண்டிப்பாக வரும். அந்த எதிர்பார்ப்பை ஓரளவுக்கு பூர்த்தி செய்யும் விதத்தில் முழுமையாக வந்திருக்கிறது இந்தப்படம்.

0 731

பாதி படத்தை எடுத்து விட்டு மீதியை முடிக்க முடியாத இக்கட்டான நிலையை இந்தப் படத்தின் தயாரிப்பாளர் சந்தித்த போது கை கொடுத்தவர்களுக்கு கண்டிப்பாக நன்றி சொல்லியே ஆக வேண்டும்.

இல்லையென்றால் ரசிகர்களுக்கு இப்படி ஒரு புதுவிதமான ரசனைச்சூழல் கிடைத்திருக்காது.

மூன்று பெரும் தயாரிப்பு நிறுவனங்கள் இணைந்து தமிழ், ஹிந்தி ஆகிய இருமொழிப்படமாக தயாரித்து ஒரு பக்காவான ஸ்டோரியுடன் ரிலீசாகியிருக்கும் படம் தான் இந்த ‘இறுதிச்சுற்று’.

பொசுக்கு பொசுக்கென்று வரும் முன் கோபத்தாலேயே பாக்ஸிங் வீரராகும் தகுதியையும், அதனால் தன் மனைவியையும் மிஸ் பண்ணும் ஹீரோ மாதவன் ‘பொம்பள பொறுக்கி’ என்கிற அடையாளத்தோடு பெண் பாக்ஸர்களுக்கு கோச்சாக வேலை செய்கிறார். அதே முன் கோபத்தால் உயர் அதிகாரியின் கடுங்கோபத்துக்கு ஆளாக, மாதவனை சென்னைக்கு ட்ரான்ஸ்பர் செய்கிறார் அந்த உயர் அதிகாரி.

ஹரியானாவில் இருந்து சென்னைக்கு வரும் மாதவன் அங்கு அவர் ஒரு பாக்ஸரை உருவாக்கியே தீர வேண்டும்.

அவர் எதிர்பார்ப்புக்கு ஏத்த ஆளாகத் தெரிகிறார் மீனவ குப்பத்தைச் சேர்ந்த துறுதுறு சுட்டிப் பெண்ணான நாயகி ரித்திகாசிங்.

கடலில் கிடைக்கும் மீனை விற்று காசு பார்த்தோமா? அக்கா, நண்பர்களுடன் சேர்ந்து ஊரையே ஜாலியாக சுற்றித் திரிந்தோமா? என்றிருக்கும் ரித்திகாவிடம் தினமும் 500 ரூபாய் செலவுக்கு கொடுத்து அவரிடம் இருக்கும் பாக்ஸிங் திறமையை வெளிக்கொண்டு வர ஆசைப்படுகிறார்.

ஆனால் மாதவன் மீது இருக்கும் ‘பொம்பள பொறுக்கி’ இமேஜால் ஏனோதானோவென்று பயிற்சி எடுக்கும் ரித்விகாவை, முதலில் இந்திய வீரராக்கி பிறகு இண்டர் நேஷனல் லெவலுக்கு கூட்டிச் செல்ல சீரியசாக முயற்சிக்கிறார்.

மாதவனின் அந்த முயற்சிக்கு அடுத்தடுத்த வரும் தடங்கல்களை தாண்டி எப்படி ரித்விகாவை ஜெயிக்க வைக்கிறார்? அதற்கு ரித்விகா ஒத்துழைப்பு கொடுத்தாரா? இல்லையா? என்பதே கிளைமாக்ஸ்.

நீண்ட இடைவெளிக்குப் பிறகு மாதவனுக்கு இது தமிழில் ரீ-எண்ட்ரி!

அறிமுகக் காட்சியில் ஒரு ‘பொம்பளை பொறுக்கி’யாக அடையாளப்படுத்தப்படும் மாதவன் அடுத்தடுத்த காட்சிகளிலும் நடிப்பில் அசால்ட் தான்! மீட்டிங் என்று அழைப்பு வர கையில் பீர் டின்னுடன் கெத்தாக உட்கார்ந்து பேசுவதும் ”மீட்டிங் நேரத்துல சரக்கடிச்சுட்டு வர்றீங்க” என்று ஒருவர் எகிறும் போது ”யோவ் நான் சரக்கடிக்கிற டைம்ல உன்னை யாருய்யா மீட்டிங் வைக்கச் சொன்னா?” என்று பதிலுக்கு எகிறுவதும் செம அப்ளாஸ் ஷாட்ஸ்!

அவர் எப்பேர்ப்பட்ட ஆளாக இருந்தாலும் முகத்துக்கு நேரே பட் பட்டென்று பேசுவதும், ”உன்னை விட எனக்கு அவன்மேல ரொம்பக் கோவம் இருக்கு” என்று சொல்லும் நாசரே ஒரு இக்கட்டான சூழலில் வந்து நிற்கும் மாதவனிடம் ”யோவ் நீ உண்மையிலேயே ரொம்ப நல்லவன்யா” என்று சொல்கிற காட்சிகளில் தியேட்டரில் கைதட்டல் காதை கிழித்தெடுக்கிறது.

தரமான படத்தை ரசிகர்களுக்குத் தர வேண்டுமென்கிற பொறுப்பு நல்ல கலைஞனுக்குரிய பொறுப்பு மாதவனிடம் இருப்பதாகவே இந்தப் படத்தை கருதலாம். ஒவ்வொரு காட்சியிலும் அப்படி ஒரு ஆளுமை!

இவர் இப்படியென்றால் அறிமுக நாயகி ரித்திகா சிங்கோ நடிப்பில் பிண்ணி பெடலெடுக்கிறார். ”யோவ் தூரப்போயா உன் மூஞ்சியப் பார்க்கவே முடியல… ந்ந்தா அந்தம்மாக்கிட்ட மீனை வாங்கு, உனக்கும் அதுக்கும் செம பொருத்தமா இருக்கும், கெழவா தள்ளிப்போயா…” என்று குப்பத்துப் பாஷையில் பேசுகிற காட்சியில் தமிழ்சினிமாவில் இப்படி ஒரு ‘துடிப்பான’ நாயகியைப் பார்த்து எத்தனை நாளாகி விட்டது என்று தான் சொல்லத் தோன்றுகிறது.

அட இவருக்கு இது முதல் படமா..? விட்டா கூத்துப்பட்டறைக்கே ஆக்டிங் சொல்லிக் கொடுப்பார் போல!

ரித்திகாவின் அக்காவாக வரும் மும்தாஸ் சர்க்கார், மாதவனின் மாமனாராக வரும் ராதாரவி, ஜூனியர் கோச்சாக வரும் நாசர், தேவ் ஜாகீர் உசேன் என படத்தின் மற்ற கதாபாத்திரங்களும் ரசிகர்களை இருக்கையோடு கட்டிப்போடுகிறது.

ரித்திகாவின் குப்பத்து அப்பாவாக வரும் காளி வெங்கட் காசுக்காக மதம் மாறுவதும், கர்த்தரே.. அல்லோலூயா என்று ஜெபிப்பதுமாக கலகலப்பூட்டுகிறார்.

‘செளகார் பேட்டை செவப்புத் தோலுக்கு ஆசைப்பட்டு சோரம் போயிட்டேயேடா சாமிப்புள்ள..’. ‘சார்,நாங்க கக்கூஸ் கழுவத் தான் லாயக்கு… ஆனா கப்’பு உங்க வாயிலிருந்துல்ல வருது…’ மாதிரியான வசனங்கள் கைதட்டலுக்குரியவை.

ஒளிப்பதிவாளர் சிவக்குமார் விஜயன் வித்தியாசமான கலர் டோனும், சதீஷ் சூர்யாவின் ‘கத்தரி’யின் கூர்மையும் பிரமாதம்..

படத்தின் குறிப்பிட்டுச் சொல்ல வேண்டிய இன்னொரு அம்சம் சந்தோஷ் நாராயணின் இசை. பாடல்களை விட்டு விடுங்கள். மாதவனும் – ரித்திகா சிங்கும் இணையும் கிளைமாக்ஸ் காட்சியில் ஒரு பின்னணி இசையை போட்டு விட்டிருப்பார் பாருங்கள். அத்தனை ரசிகர்களையும் புல்லரிக்க வைத்து விடுகிறது அவரது ரம்மியமான இசை!

கிரிக்கெட்டில் மட்டுமல்ல, எல்லா விளையாட்டிலும் அரசியல் இருக்கும்! ஆனால் அது இவ்வளவு தூரத்துக்கு இருக்குமா? என்று வெகுஜன ரசிகனும் அதிர்ச்சியடைகிற அளவுக்கு உண்மைகளை காட்சிப்படுத்தியிருக்கும் இயக்குநர் சுதா கொங்கரா இது பல உண்மைச் சம்பவங்களின் பதிவு என்பதையும் மறக்காமல் சொல்லி விடுகிறார்.

பொதுவாகவே இந்திய விளையாட்டுச் சந்தையில் இருக்கும் அதிகார வர்க்கத்தினரின் பாலிடிக்ஸ் என்பது வெளி உலகத்துக்கு பெரிய அளவில் தெரியாத விஷயம்.

‘ஜீவா’ படத்தில் கிரிக்கெட்டில் ஒரு சமூகத்தினர் மட்டும் காலங்காலமாக செய்து வரும் ஆளுமையை டைரக்டர் சுசீந்திரன் தோலுரித்துக் காட்டியிருந்தார். அதே பாணியில் இந்தப் படத்தில் குத்துச் சண்டை விளையாட்டில் இருக்கிற, குறிப்பாக பெண்கள் குத்துச்சண்டை விளையாட்டில் இருக்கிற அதிகார வர்க்கத்தினரின் ஏகபோகம், தரங்கெட்ட செயல்பாடுகள் உள்ளிட்ட மோசமான பக்கங்களை அம்பலப்படுத்தியிக்கிறார் பெண் இயக்குநர் சுதா கொங்கரா.

அந்த துணிச்சலுக்கும், திறமைக்கும் இந்தாங்க மேடம் ஒரு பொக்கே!

0 713

‘அரண்மனை’ முதல் பாகத்தின் பேய்த்தனமான வெற்றியைத் தொடர்ந்து அதையே ஜெராக்ஸ் எடுத்தது போல ரிலீசாகியிருக்கும் படம் தான் இந்த ‘அரண்மனை 2′.

சன்னிலியோனை வைத்து படமெடுத்தாலும் அதையும் கவர்ச்சி பிளஸ் காமெடி படமாகத்தான் எடுப்பார் போலிருக்கிறது டைரக்டர் சுந்தர்.சி

முதல் பாகத்துக்கும் இரண்டாம் பாகத்துக்கு நடிகர், நடிகைகள் மத்தியில் மட்டுமே மாற்றங்களை செய்திருக்கிறாரே தவிர முதல் பாகத்தைப் பார்க்காதவர்கள் இந்த இரண்டாம் பாகத்தை பார்க்கலாம். அதுக்கு ஒரு சான்ஸ் என்று சொன்னாலும் அதில் தப்பேதுமில்லை.

ஊரை காக்கும் அம்மனுக்கு சக்தி இல்லாத நாள் ஒன்றில் பேயோட்டிகள் எல்லோரும் ஒரு இடத்தில் கூடி உட்கார்ந்து கொண்டு சும்மா இருக்கும் ஆவிகளை தூண்டிவிட்டு தங்கள் தொழிலை பெரிதாக்கிக் கொள்ள பூஜை ஒன்றை செய்கிறார்கள்.

அதில் கிளம்பி வரும் பேய்களில் அதீத சக்தி கொண்ட ஒரு பேய் ஊருக்குள் இருக்கும் பெரிய அரண்மனைக்குள் தஞ்சம் புகுந்து விடுகிறது.

அந்த வீட்டின் பெரிய மனிதரான ராதாரவியை கோமா ஸ்டேஜுக்கு கொண்டு போய் விட, அவரது மகன் சுப்பு பஞ்சு என்ன ஆனார் என்றே தெரியாமல் போக, இடையில் வீட்டு வேலைக்காரணும் கொலை செய்யப்பட… இப்படி அடுத்தடுத்து பழி வாங்கும் அந்த பேய் யார்? அதனிடமிருந்து வீட்டில் உள்ளவர்கள் எப்படி தப்பிக்கிறார்கள்? ஏன் அந்த அரண்மனையில் உள்ளவர்களை பழி வாங்கத் துடிக்கிறது? போன்ற கேள்விகளுக்கு ப்ளாஷ்பேக் பிளஸ் பிரம்மாண்ட அம்மன் பாடலோடு அடுத்த பாகத்துக்கு புள்ளி வைத்து சுபம் போடுகிறார் டைரக்டர் சுந்தர்.சி.

ஹீரோ சித்தார்த் என்றாலும் கிளைமாக்சில் கைதட்டல்களை அள்ளிக்கொண்டு போவது என்னவோ சுந்தர்.சி தான். அவரும் முந்தைய பாகத்தில் வந்த கேரக்டரின் தொடர்ச்சியாக வருகிறார்.

சித்தார்த்தின் கவர்ச்சிக் காதலியாக த்ரிஷா! த்ரிஷாவைப் பார்த்து ரசிகர்கள் பயப்படுறாங்களோ? இல்லையோ? கெறங்கி விழுறது கன்பார்ம்! ஏன்னா படத்துல சுந்தர்.சியோட டைரக்‌ஷன் ‘டச்’ அப்படி!

எக்ஸ்ட்ரா கவர்ச்சிக்காகவே பூனம் பாஜ்வாவை நடிக்க வைத்திருக்கிறார்கள். ‘அரண்மனை’ முதல் பாகத்தில் வந்தது போலவே இதிலும் செண்ட்மெண்ட் காட்சிகளில் ரசிகர்களின் பரிதாபத்தை அள்ளிக் கொள்கிறார் ஹன்ஷிகா!

முதல் பாகத்தில் சந்தானம், மனோபாலா, கோவை சரளா காம்பினேஷன் காமெடி களை கட்டியது. இதில் சந்தானத்துக்குப் பதில் சூரி! டபுள் மீனிங் வசனங்களோடு கோவை சரளாவை அவர் ஓட்டும் காட்சிகள் செம செம.

ஹிப் ஹாப் தமிழாவின் இசையில் கிளைமாக்ஸில் வரும் அம்மன் பாடலில் காட்சிகளுக்கேற்ற பிரம்மாண்ட இசையாக வெளிப்படுகிறது. சில இடங்களில் தேவையில்லாத இரைச்சல். மற்ற பாடல்களில் ‘ஆம்பள’ சாயல் தெரிகிறது.

பூனம் பாஜ்வா சாதாரணமாக உட்கார்ந்து பேசும்போது கூட பின் பக்கத்தில் கேமராவை வைத்து அவரது முதுகையும், இடுப்பையும் திரையில் பெரிதாகக் காட்டி கவர்ச்சி விருந்து படைத்திருக்கிறார் ஒளிப்பதிவாளர் யு.கே.செந்தில்குமார்.

ஆக்‌ஷன் படங்கள்ல எப்படி லாஜிக் பார்க்கக் கூடாதோ? அதேமாதிரி தான் பேய் படங்கள்லேயும் லாஜிக் பார்க்கக் கூடாதுன்னு சொல்ற மாதிரி தனக்கே உரிய ‘கலகலப்பு’ ஸ்டைல்ல கொடுத்திருக்கிறார் டைரக்டர் சுந்தர்.சி

0 970

”ஜல்லிக்கட்டு காளையை புல்லுக்கட்டு சுமக்க விட்ட கதையாக எதற்காக இப்படி ஒரு பக்கா எண்டர்டெயினர் படத்தை ரிலீஸ் சிக்கலில் சிக்க விட்டார்கள்” என்கிற கேள்வி? படம் பார்த்து விட்டு வெளியே வருகிற அத்தனை ரசிகர்களின் மனதிலும் எழும்பி விட்டிருக்கும்.

தாத்தா – பேரன் பாசப்பிணைப்போடு காதல், ஃபேமிலி, செண்டிமெண்ட், காமெடி என அத்தனை ரசனைகளையும் ஒன்றாக்கி நிஜமான பொங்கல் விருந்து படைத்திருக்கிறார் இயக்குநர் பொன்ராம்.

நான்கைந்து கேரக்டர்களை வைத்துக் கொண்டே கதையை நகர்த்த அல்லல்படும் இயக்குநர்களுக்கு மத்தியில் எக்கச்சக்க நட்சத்திரங்களை படம் முழுக்க உலவ விட்டு அதகளம் பண்ணியிருக்கிறார்கள். ரெண்டரை மணி நேரம் போவதே தெரியாமல் ரசிகர்களை கட்டிப்போடுகிறார்கள்.

அத்தனை பேரப்புள்ளைகள் இருந்தும் எல்லோரும் வெளிநாடுகளுக்கு சென்று குடும்பத்தோடு செட்டிலாகி விட, கூடவே இருந்து பாசம் காட்டுகிற ஒரே பேரன் தான் சிவகார்த்திகேயன்.

அவருக்காக தனது சொத்து பத்துகளை விற்று பங்கு பிரித்து கொடுக்க ஆசைப்படும் ராஜ்கிரண் அதற்கான வேலையில் இறங்குகிறார். இதற்கிடையில் சின்ன வயசிலிருந்தே இவள் தான் உனக்கு என்று அப்பாவால் கை காட்டி விடப்படுகிற கீர்த்தி சுரேஷை துரத்தி துரத்தி காதலிக்கிறார்.

இன்னொரு பக்கம் அதே ஊரில் அடுத்தவனை மிரட்டியே காசு பார்க்கும் ரெளடியான சமுத்திரகனி நானும் ராஜ்கிரணின் பேரன்களில் ஒருவன் தான் அதனால் எனக்கும் சொத்தில் பங்கு வேண்டுமென்று மல்லுக்கு நிற்கிறார்,

அவரிடமிருந்து பூர்வீக சொத்துக்களை மீட்டு கீர்த்தி சுரேஷை சிவகார்த்திகேயன் கை பிடித்தாரா? இல்லையா? என்பதே கிளைமாக்ஸ்.

நீண்ட இடைவெளிக்குப் பிறகு சிரிக்க சிரிக்க மதுரை பின்னணியில் காமெடிப்படம். வழக்கமான சிவகார்த்திகேயனின் மேனரிசங்கள், டயலாக் டெலிவரி என ரஜினிமுருகன் கேரக்டரில் கலகலப்பூட்டுகிறார் சிவகார்த்திகேயன். போதாக்குறைக்கு சூரியும் சேர்ந்து செய்யும் அளப்பறையில் தியேட்டரே சிரிப்பு சத்தங்களில் குலுங்குகிறது. சத்யராஜ் – கவுண்டமணி காம்பினேஷன் போல சிவகார்த்திகேயன் – சூரி காமெடி காம்போ சூப்பராக ஒர்க்-அவுட் ஆகியிருக்கிறது.

வில்லனாக வரும் சமுத்திரக்கனியை இப்படி ஒரு கேரக்டரில் எந்தப்படத்திலும் பார்த்திருக்கவில்லை தமிழ்சினிமா ரசிகர்கள். ஊருக்கு ஒருவனாக இப்படிப்பட்ட கெட்ட மனுஷன் இருப்பான் என்கிற கேரக்டர் தான் அவருடையது.

அறிமுகக் காட்சியில் பயங்கர வில்லத்தனத்தோடு அறிமுகமாகிறவர் கிளைமாக்ஸில் பார்த்தியா கொடுத்த 1 லட்சத்தை வாங்கிட்டம்லே… என்று கெத்தாக திரும்பிப் போகும் போது விசில் சத்தம் காதை பிளக்கிறது.

தாத்தாவாக வரும் ராஜ்கிரண் அற்புதமான தேர்வு.

”உங்களுக்கெல்லாம் உங்க பசங்களை பார்க்காம இருக்க முடியாது, அதேமாதிரி தான் என்னாலேயும் உங்களை பார்க்க இருக்க முடியலேப்பா… ஆனால் நீங்க யாருமே எந்த காரணத்தை சொல்லிக் கூப்பிட்டாலும் என்னை பார்க்க வர மாட்டேங்கிறீங்க, அதனால தான் நான் செத்துப் போற மாதிரி நடிச்சி உங்களை வர வெச்சேன்” என்று உருகி அழுகிற காட்சியில் கூட்டுக் குடும்பத்தின் பெருமையை கண் முன் கொண்டு வருகிறார் ராஜ்கிரண்.

சின்னச் சின்ன காமெடி டைமிங் வசனங்கள் தான் படத்துக்கு முதுகெலும்பு, படம் முழுக்க அந்த மாதிரியான காட்சிகளை தூவிவிட்டு திரைக்கதை வேகம் எடுக்கிறது.

டி.இமான் இசையில் உம்மேல ஒரு கண்ணு பாடல் திரும்ப திரும்ப கேட்க வைக்கும் மெலோடி என்றால், என்னம்மா இப்படி பண்றீங்களேம்மா.. யூத் காமெடி ட்யூன்!

பாலசுப்ரெமணியத்தின் ஒளிப்பதிவில் கீர்த்தி சுரேஷுக்கு சுத்திப் போட வேண்டும், அப்படி ஒரு கிராமத்து அழகியாக வருகிறார். நடிப்பிலும் ஸ்கோர் செய்கிறார்.

இதுவும் மதுரைப் பின்னணியில் நகரும் படம் தான். ஆனால் ஒரு காட்சியில் கூட துளி ரத்தம் இல்லை. சிரிக்க சிரிக்க ரசித்து விட்டு வரலாம்! நம்பி வாங்க சந்தோஷமாப் போங்க என்று ட்ரெய்லர்களில் ஒரு வாசகம் வரும், அதை படத்தின் ஒவ்வொரு காட்சியிலும் உண்மையாக்கி பொங்கலுக்கேத்த உண்மையான ஃபேமிலி எண்டர்டெயினராக கொடுத்திருக்கிறார் இயக்குநர் பொன்ராம்.

0 714

சந்தானத்தை துணைக்கு வைத்துக் கொண்டு காமெடி ஹீரோ வேஷம் கட்டிக் கொண்டிருந்த உதயநிதி முதல்முறையாக ஆக்‌ஷன் பக்கமும் எட்டிப் பார்ப்போமே என்கிற துணிவோடு களமிறங்கியிருக்கும் படம் தான் இந்த ‘கெத்து’.

அப்பா உடற்பயிற்சி வாத்தியாராக வேலை பார்க்கும் பள்ளிக்கு எதிரே அண்ணனோடு சேர்ந்து கொண்டு ஒரு டாஸ்மாக் கடையை ஆரம்பிக்கிறார் வில்லன் மைம்கோபி.

அங்கு குடிப்பவனெல்லாம் பள்ளிக்கூட காம்பவுண்ட்டுக்குள் வாந்தியெடுத்து கிடக்க, கடையை அகற்றச் சொல்லி சத்யராஜ் தரப்பிலிருந்து போலீசுக்கு புகார் போகிறது.

இதற்கிடையே காசுக்காக தீர்த்துக் கட்டுகிற வேலையைச் செய்யும் தீவிரவாதி(?) விக்ராந்த்துக்கு ஒரு விஞ்ஞானியை கொலை செய்யச் சொல்லி உத்தரவு வருகிறது. அதை நிறைவேற்றும் பொருட்டு சத்யராஜ் இருக்கும் ஊரான குமுளிக்கு வருகிறார்.

சத்யராஜூக்கும், மைம்கோபிக்கும் மோதல் முற்றிய நிலையில் அடுத்தநாள் மைம்கோபி மர்மமான முறையில் இறந்து கிடக்கிறார். கொலைப்பழி சத்யராஜ் மீது விழ, செய்யாத கொலைக் குற்றத்திலிருந்து அப்பா சத்யராஜை மகன் உதயநிதி எப்படி மீட்டுக் கொண்டு வருகிறார்? என்பதே கிளைமாக்ஸ்.

முந்தைய படங்களை கம்பேர் செய்யும் போது டான்ஸ், ஆக்டிங்கோடு கூடுதலாக ஆக்‌ஷனிலும் பாஸ்மார்க் வாங்குகிறார் உதயநிதி. அப்படி இருந்தும் முகத்தில் தெரிகிற குழந்தைத் தனம் மாறாமல் இருப்பது தான் ‘அய்யோ பாவம்’ என்றாகிறது.

சுகுமாரின் ஒளிப்பதிவில் பாடல் காட்சிகளில் கலர்ஃபுல்லாகத் தெரியும் எமி ஜாக்சன், இதர காட்சிகளில் ‘ப்ப்பா… யார்ரா இந்தப் பொண்ணு… என்று ரசிகர்களை கதற விடுகிறார். அதிலும் சவீதாவின் பின்னணிக்குரலில் லீப் மூவ்மெண்ட் கொடுக்க ரொம்பவே கஷ்டப்படுகிறார். சில காட்சிகளில் குறும்புத்தனம் செய்கிறேன் பேர்வழி செய்யும் எக்ஸ்பிரசன்கள் அடங்கப்பா…? எதுக்கு சம்பளமும் கொடுத்து சரியாக லிப் மூவ்மெண்ட்டும் கொடுக்க முடியாத ஒருவரை நடிக்க சொல்லி கஷ்டப்பட வேண்டும் என்று தெரியவில்லை.

பொறுப்புள்ள, ஜாலியான அப்பா, டீசண்ட்டான உடற்பயிற்சி ஆசிரியர் என மிதமான நடிப்பில் பிரமாதப்படுத்தியிருக்கிறார் சத்யராஜ்.

ராஜேஷ் ஏதோ பழைய படங்களில் கெட்டப் போட்டது போல வருகிறார், உதயநிதியின் நண்பராக வரும் கருணாகரன் காமெடி செய்வதை விட கேரக்டர் ஆர்ட்டிஸ்ட்டாகத்தான் தப்பிக்கிறார்.

தீவிரவாதியாக வரும் விக்ராந்த் படத்தின் எந்த சீனிலும் வாயைத் திறந்து ஒரு வார்த்தை பேசவில்லை. அமைதியாக வருகிறார்… வலது, இடது, கீழே, மேலே என எல்லா திசைகளிலும் கோபமாகப் பார்க்கிறார். நேராகப் பார்த்து துப்பாக்கியை குறி வைக்கிறார்…. கிளைமாக்ஸில் எதிர்பார்த்தபடியே உதயநிதியிடம் சண்டைப்போட்டு தோற்றுப் போகிறார். விக்ராந்த்தை பயன்படுத்த வேண்டிய ‘அளவு’ நன்றாகத் தெரிந்திருக்கிறது. அந்த அளவுக்குள்ளாகவே பயன்படுத்தியிருக்கிறார் இயக்குநர்.

சுகுமாரின் ஒளிப்பதிவில் இவ்வளவு பச்சை பசேல் என்கிற ‘குமுளி’யைப் பார்ப்பது ஆச்சரியம் தான். அதே சமயத்தில் எதற்கெடுத்தாலும் மரத்தில் தொங்கிக் கொண்டு கேமராவை டாப் ஆங்கிளில் வைப்பது பழக்க தோஷத்தை அடுத்தடுத்த படங்களில் விட்டொழிப்பது நல்லது.

ஹாரீஸ் ஜெயராஜின் இசையில் ‘தில்லு முல்லு’, ‘தேன் காற்று’ பாடல்கள் ரிப்பீட்டஸ் ட்யூன்ஸ்! பின்னணி இசையில் ரிலீஸ் அவசரம் அப்பட்டமாகத் தெரிகிறது. இப்படி பின்னணி போடவா ஓவரா…. டைம் எடுத்துக்கிறீங்க ஹாரீஸ்?

உதயநிதி இந்த ஆக்‌ஷன் ஏரியாவுக்கு பழக்கமில்லாதவர் என்பதால் அவராலும் ஒரு லெவலுக்கு மேல் ஒன்றும் செய்வதற்கில்லை.

டெக்னிக்கலா நல்ல சவுண்ட்டு உள்ள ஆளாகத் தெரிகிறார் இயக்குநர் திருக்குமரன். ஆனா படத்தோட வசூலுக்கு அது மட்டுமே போதுமாங்கிறது அவருக்கே வெளிச்சம். ‘மான் கராத்தே’வைப் போலவே இதிலும் தொழில்நுட்ப விஷயங்களில் மட்டும் அதிக கவனம் செலுத்தியவர் கதை, திரைக்கதை, வசனம் போன்ற இடங்களில் மிகப்பெரிய வெற்றிடத்தை விட்டிருக்கிறார்.

0 739

இளையராஜா – பாலா – சசிகுமார் மூவர் கூட்டணியில் மிகுந்த எதிர்பார்ப்பில் ரிலீசாகியிருக்கும் படம்.

பாலாவின் படங்களுக்கென்றே ரெகுலரான ‘கலர்’ உண்டு. அதீத வன்முறை, குரூர புத்தி, ரத்தம் தெறிக்க தெறிக்க சங்கை அறுப்பது, அல்லது கடித்துக் குதறுவது என்கிற சிகப்புக் கலர் அது.

‘நான் கடவுள்’ படத்தில் தாங்கக் கூடிய அளவுக்கு காட்டியவர் இதில் இரண்டாம் பாதியில் ஈரக்குலையே நடுங்கிப் போகிற அளவுக்கு திகட்ட திகட்ட வன்முறை வெறியாட்டம் ஆடியிருக்கிறார்.

தமிழர்களின் பாரம்பரிய கலைகளில் ஒன்றான கரகாட்டக்கலையை பெருமைப்படுத்தும் விதமாக படத்தை எடுத்து வைத்திருப்பார். மணக்க மணக்க ரசித்து விட்டு வரலாம் என்கிற எண்ணத்தோடு தியேட்டருக்கு போகிற ரசிகனை ரத்தச் சகதியில் குளிக்க வைத்து தலை துவட்டி அனுப்புகிறார்கள்.

முதல் பாதி பரவாயில்லை என்கிற மனநிலையில் இருக்கிற ரசிகனை இரண்டாம் பாதியில் ”இனிமே என் படத்தைப் பார்க்க வருவியா… வருவியா…” என்கிற கொலை வெறியோடு சீனுக்கு சீனுக்கு குத்திக் கிழிக்கிறார்.

தஞ்சாவூரில் பிரபலமான இசைக்கலைஞராக இருக்கும் ஜி.எம்.குமாரின் மகன் நாயகன் சசிகுமார். இவர் ஒரு கரகாட்டக்குழுவை வைத்து பிழைப்பு நடத்தி வருகிறார். அதே குழுவில் கரகாட்டக்காரியாக இருப்பவர் நாயகி வரலட்சுமி.

”ஏய்ய்ய்… மாமோய்…” என்கிற வார்த்தை தான் அவளுக்கு சகலமும். ”ஏ… மாமன் பசி ஆறணும்னா நான் அம்மணமாக்கூட ஆடுவேன்” என்று சொல்கிற அளவுக்கு நெஞ்சு முழுக்க சசி மீது காதல்.

அவளை பெண் கேட்டு வருகிறார் அப்பாவி வேஷம் போடும் புதுமுகம் தயாரிப்பாளர் சுரேஷ். சசிகுமாரும் வரலட்சுமியின் வாழ்க்கை நன்றாக இருக்கட்டுமே என்கிற எண்ணத்தில் அவருக்கே முன் நின்று திருமணத்தை நடத்தி வைக்கிறார்.

திருமணமான கையோடு காணாமல் போன வரலட்சுமி என்ன ஆனார்? என்கிற கேள்வி ரசிகனுக்கு வருகிற நேரத்தில் அவரைத் தேடிப்போகிறார் சசிகுமார்.

அதன்பிறகு வருகிற காட்சிகள் அனைத்தும் வன்முறையின் உச்சம்! பீதியில் தலையை குணிந்து கொண்டு மொபைலில் டெம்பிள் ரன்னையோ, ஆங்கிரி பேட்டையே விளையாட ஆரம்பித்து விடுகிறான் ரசிகன்.

தலைவிரி கோலமாக வருகிறார் சசிகுமார். இரண்டாம் பாதியில் ‘நான் கடவுள்’ ஆர்யா ஸ்டைலில் ஒரு பைட் சீனில் மிரட்டும் வேகம். கரகாட்டக்குழுவை நடத்த அவர் படும் பாட்டை பார்க்கும் போது ரசிகர்களிடம் பரிதாபத்தை அள்ளிக் கொள்கிறார்.

இதற்கு மேல் நடிப்பதற்கு ஒன்றுமில்லை என்கிற ரேஞ்சில் கரகாட்டக்காரியாக வரும் வரலட்சுமி, ஆடுவதில் மட்டுமல்ல… தன்னை தப்பான எண்ணத்தோடு தொட வருகிற ஆண்களுக்கும் கொடுக்கிற அடி ஒவ்வொன்றும் இடி தான்.

கரகாட்ட சீனைக் காட்டும் போதெல்லாம் மறக்காமல் வரலட்சுமியின் தொப்புளை ஸ்க்ரீன் முழுவதிலும் காட்டுகிறார் ஒளிப்பதிவாளர் செழியன். மற்றபடி சிலாகித்துச் சொல்ல ஒன்றுமில்லை.

வில்லனாக வருகிற தயாரிப்பாளர் சுரேஷூக்கு இரண்டு விதமான கேரக்டர்கள். முதலில் அப்பாவி போல அடங்கி வரலட்சுமியை கைபிடிக்க துரத்துவதும், கழுத்தில் தாலி கட்டி முதலிரவு அறைக்குள் கூட்டிச் சென்றவுடன் தனது சுயரூபத்தை காட்ட ஆரம்பிப்பதுமாக ஆக்டிங்கில் அப்ளாஸ் வாங்குகிறார்.

திறமை இருக்கும் இடத்தில் கொஞ்சம் திமிர் இருப்பது இயற்கை தான். ஆனால் ஜி.எம்.குமாரோ எப்போதுமே திமிர்த்தனத்துடன் தான் கத்திக் கொண்டிருக்கிறார். அவருடைய திறமைக்கு ஒரு ஒரு பாடலை போட்டு அத்தோடு ஓரங்கட்டி விடுகிறார்கள்.

வரலட்சுமியுடன் கரகாட்டக்காரிகளாக வரும் சக நடிகைகள் ஆடுகிற ஆட்டத்தில் சகலமும் குலுங்குகிறது. ஆனால் யார் ரசிப்பது..?

இந்த வன்முறைகளுக்கு நடுவே இசைஞானியின் பின்னணி இசையும் பாடல்களும் தான் படம் பார்க்கப்போகிற ரசிகனுக்கு ஒரே ஒரு ஆறுதல்!

காது கேட்கக் கூசும் கெட்ட வார்த்தைகள் வசனங்களாக படத்தில் ஆங்காங்கே சர்வசாதரணமாக ஒலிக்கிறது.

பெண்களும், குழந்தைகளும் தியேட்டர்களுக்கே வருவதில்லை என்று குறைபட்டுக் கொள்கிற தயாரிப்பாளர்கள் தான் இந்தமாதிரி அபத்தங்களையும் தயாரிக்க முன் வருகிறார்கள்.

இப்படிப்பட்ட படங்களை எடுத்தால் எப்படி பெண்கள் கூட்டம் தியேட்டர் பக்கம் வருவார்கள் என்பது அவர்களுக்கே வெளிச்சம்.

கரகாட்டக்கலைஞர்களின் வலிகளையும், வேதனைகளையும் காட்ட நினைத்த பாலா இரண்டாம் பாதியில் அதிலிருந்து விலகி தனது வழக்கமான பாதையில் பயணிப்பது தான் வேதனையிலும் வேதனை. அந்த வகையில் நட்சத்திரங்களிடம் நடிப்பை பிழிந்தெடுத்தது மட்டுமே புதுசு. மத்ததெல்லாம் பாலாவின் பழைய ‘டச்’ தான்.